由年半前兩個籮柚痕話要結婚，直到喺意大利father見證下say yes然後極速兩星期內喺香港補擺一餐，就喺香港嗰餐嘅前一晚，身邊好多人仍摸唔透點解有擺兩餐嘅需要。
我天生愚笨，口才更笨實，但我一直都好清楚自己做緊乜。喺旁人眼中十常八九嘅一個補擺港式婚宴，對我嚟講，呢一日跟我同意佬交換戒指的一日同樣重要。
從未戒奶阿媽日夾夜幫我換尿片，幼稚園橫豬格格咁兩手橫申就有侍婢阿媽幫我著上校服裙。經歷無數血汗屎水，呢日佢盡為人阿媽最後一次幫女著衫嘅責任，好好把女兒穿得整整齊齊，美美的喺生根地將女兒交托俾女婿。
我有說話未曾講
如何能連繫上與你再相伴在旁。
意大利的婚禮，只有神父講冇你講。佢哋飲咖啡唔飲茶，但唔見得嫁女娶新抱會有斟咖啡環節。感恩香港有敬茶儀式，老人家扛在肩上的肺腑之言，意佬笑笑口表示佢完全聽唔明，但我洗耳恭聽，聽得津津樂道。自細老豆對我嘅期望好高，依家我要嫁人，反而佢只贈咗我幾隻字「我別無所求，你倆最緊要開開心心」。佢贈得咁少字，因為佢知道女大當嫁，係時候放手了，冇嘢緊要得過個女嫁得開開心心，揾到個好人家可過幸福快樂嘅生活。
入鄉隨俗，奶奶都話要飲新抱茶，嗚啊我竟然聽得明哂奶奶想同我哋講嘅話！三對手牢牢地握著，奶奶講講吓，四目交投，明了，明哂佢有一個初見面一句說話都溝通唔到嘅新抱，明哂呢幾年嚟我哋返親意大利都喺奶奶度住，久而久之我嘅起居飲食佢都瞭如指掌更將我當自己個女咁看待，明哂我哋結婚要搬走了，佢好開心個仔成家立室但又好鬼唔捨得...我同奶奶都即刻岳高個頭，兜返住啲眼淚怕整溶個妝。
香港擺酒當日所渡過嘅每一分一秒，對我對意佬對雙方將我倆養大成人嘅老人家，都係once in a lifetime 值得好好銘記在心中的美好時光。
其實說我口笨，倒不如話我有口都唔想解釋。辛苦了一班兄弟姊妹同兩協插刀胳肋底流住血咁幫我嘅知己朋友，佢哋全日好幫得手之餘亦能幫我解答以下問題：
「擺餐酒考順自己阿爸阿媽，需要理由嗎？」
Search